Libby McArthur is it hame oan thi stage. Weel-kent frae TV, this dauchtur o Mrs Barbour is gallus, blythe an bonnie as Joan thi couthie carer o hur crabbit Auntie Mary. Crabbit she may be, bit wha kin say she didnae hae cause, as A.J. Taudevin’s scrip disnae avoid thi conflick atween young Mary an hur sister Grace aye singin an oot paradin fur thi richts o wummen an workin men, whilst Mary lukes efter hur weans. Anna Hepburn maks thi traunsition frae geriatrick tae gamine tae grown wumman weel, an thi sangs o Angela Darcy catch it thi hert, specially thi Shifters’ Sang. Aabodie wha kens thi historie o thi lassies o thi Paisley ur Dundee Jute Mills wullnae hear thon sang wioot a tear in thur een. Forbye thi conflicks oer caring fur bairns an gangin oot tae work, thi radio voices o Billy Mack an Kirsty McIntyre report thi falloot frae modern monetarism: austeritie. An Libby, statuesque as thi stateswumman, proclaims thi richts o wumman an workin men, frae thi Gods tae thi stage, cajolin thi audience fur tae care, tae be ther fur wan anither an, wi thi staunch backup o thi Voice Beat chorus, tae sing fur victorie.
Anna Hepburn as Auntie Mary, frae Tron publicitie.
alchemicalquality 